⼁資料來源： HELLOTOBY

發佈日期： 2018-08-03

想喺香港創業經商？想知創業小貼士？提起 小本創業 你又會諗起咩嘢？

好多香港青年唔想做成世打工仔，希望可以創業做老闆，做 創業家 ，一嘗自己話事嘅滋味。芸芸咁多個行業之中，有唔少人都會選擇投身飲食業。但香港租金昂貴， 喺香港 創業嘅成本十分之高。面對 創業資金 短缺問題，唔同 創業家 有佢自己嘅方法。今次我哋好榮幸邀請到烹飪工作室（cooking studio）五木舍 嘅店主Don同Mab 分享佢哋 畢業後小本創業 嘅奮鬥史。

1） 創業 過程 － 融合興趣 開展創業之旅

店主之一嘅Mab畢業之後嘗試過接觸不同行業，由設計、繪畫、咖啡沖泡、烹飪等項目都有涉獵。「當初一開始其實係想開創業咖啡店，但入行後發覺喺香港開咖啡店嘅生意成本實在太高，夢想難以達成。」Mab留意到廚師發展空間相當之大，投資回報率甚高，而且租用工廠作為烹飪教室嘅租金亦相對便宜。所以本著嘗試嘅心態，使用當時擁有的創業資金，最終喺2017年8月同做木工嘅另一半Don創立了自己嘅烹飪工作室—— 五木舍 。

喺呢一年時間，Don同Mab嘅烹飪工作室剛剛開始嘅時候確實係遇上咗唔少困難。但到現時，烹飪工作室嘅總算運作開始上了軌道，收入算係穩定。編者問到佢哋點樣可以喺短時間將但呢一年來烹飪室可以搞到有聲有色，發展公司生意，佢哋用自身經驗歸納出六項建議，希望可以俾同樣都想創業嘅年輕人參考，作為 創業分享 。

 

2） 創業心得

2.1 創業貼士 1：絕不能假手於人

好多人一開始想創業嘅時候都興致勃勃，但Mab同Don認為一開始創業嘅時候必定要親力親為打理生意。五木舍剛剛開業嘅時候，Don同Mab就兼顧多項工作，分身不暇。「由裝修、宣傳、開班、日常打掃清潔、洗碗、客服等等工作都是由自己做，冇一個正式嘅收工時間。」雖然比較辛苦，但因為佢哋對烹飪有強烈嘅興趣，佢哋願意花好多時間喺公司，亦只有咁，佢哋先能夠了解公司嘅一切運作。當公司走上軌道，要請員工嘅時候，就可以清晰地交帶工作俾下屬，咁樣公司先可以運作得長久。雖然做老闆一開始會比打工更加辛苦，但可以將興趣發展成為事業，有幾辛苦都係值得。

 

2.2 創業貼士 2：多角度思考

創業家 當家作主唔可以墨守成規，遇上生意唔好嘅時候更唔可以坐以待斃。遇到生意唔好嘅時候，要學識變通，處理各種問題，先至係成功之道。正如五木舍開始創業時候顧客唔多。Don提到當時要靠私人開班、朋友租場、同團體合作開辦課程等等慢慢累積客源。要留住呢班客源，佢哋除咗會用社交媒體 Facebook 專頁、Instagram 同客人互動，亦要定時更換課程菜式，吸引客人繼續參與。另外，佢哋亦會喺工作坊內容、形式、收費等多個方面不斷思考點樣改進。

坊間其實亦有唔少烹飪工作室，所以創辦初期亦都要考慮點樣為五木舍定位。Don同Mab將五木舍塑造成一個有如屋企一般寧靜舒適嘅烹飪室，希望學生可以喺零學習壓力下上烹飪工作坊，從而享受烹飪。同時，Mab同導師亦會同學員好似朋友咁相處，鼓勵佢哋喺烹飪班同工作坊以外選擇更環保及健康嘅食材，達致健康自煮快樂嘅概念。

 

2.3 創業貼士 3：不怕吃虧

正所謂：「萬事起頭難。」 剛喺 香港創業 嘅時候，機會並唔常有。雖然人人都想「將興趣變成事業」，但並唔係個個想創業嘅人都可以有一筆創業基金，Don同Mab就認為，只要有機會，就應把握努力去做。長久下去，就可以慢慢累積經驗，更可能可以喺短期內創業回本，提高每月營業額。佢哋除咗自己會開辦唔同嘅烹飪班外，亦會同其他機構合作，邀請不同導師授課。

喺呢一年裡，Mab亦都同唔少家電、廚具品牌合作，慢慢增加烹飪工作室嘅設備，製作唔同嘅食譜。咁樣就可以開辦更多唔同類型嘅煮野食班，例如有法國菜、中式點心、韓國菜等。諗返轉頭，如果當初Don同Mab因為驚蝕底而拒絕同佢哋合作嘅話，就唔會有以上咁寶貴嘅經驗同歷練喇！

 

2.4 創業貼士 4：為目標訂下每天嘅路線圖

Mab同Don認為成功創業係好需要自己個人自律。如果想達成自己創業嘅目標，就需要訂立時間表。要規定自己定時完成某啲目標，咁就可以按步就班，向住自己嘅目標進發。時間不等人，如果漫無目的咁創業，就會浪費自己時間，同時亦浪費自己創業資金。

 

2.5 創業貼士 5：做好宣傳推廣，擴充人脈

五木舍建議公司喺創業初期，盡量爭取機會使用不同渠道宣傳公司，介紹自己公司嘅業務。除咗使利用網上平台外，Mab最近就上咗TVB《美女廚房 2018》擔任嘉賓，俾廣大觀眾認識Mab本人同公司五木舍。同時，Mab亦有到市集推廣公司，並接受媒體專訪，擴充人脈，咁樣唔單止可以擴充客源，亦都可以搵到商業公司贊助。如果冇認識到呢班合作商，五木舍也未必可以咁順利拓展。

所以，Don 同 Mab 都建議，想創業嘅朋友不妨主動尋求同不同品牌、平台合作嘅機會，例如喺品牌進行發佈會或者產品宣傳時，開設工作坊。準創業家亦可同社區中心合作，開設不同類型嘅小型興趣班或工作坊，除咗可以宣傳公司，由於外面場地較大，可同時教授更多學員嘅話，仲可以賺取更高利潤。

 

2.6 創業貼士6：大膽嘗試

五木舍 嘅烹飪班相當之多元化，由意式嘅手工素意大利粉到韓式髒髒包都有。臨近節日，更加會推出相應嘅節日食品。例如喺中秋節期間，五木舍就開辦咗整彩虹潮式酥皮月餅班。Don同Mab相信沒有一個人可以做到十全十美。如果要等到一件事百分之百有利又萬無一失後才做，機會就會白白流走，拱手他人。就以韓式髒髒包嚟講，坊間少有同髒髒包相關嘅烹飪班，由於佢哋能提供相關課程，所以正正能吸引想學整髒髒包顧客嘅注意，並且吸引唔少媒體報導宣傳，為五木舍打響名堂。

 

3） 五木舍 未來展望

五木舍希望同家電、廚具品牌合作，增加廚房設備。一間設備完善嘅廚房可以支援到導師教比較多人和唔同種類嘅熟食課程。長遠嚟講，Don同Mab希望可以擴展工作室規模，可以吸納更多公司團體客戶同得到佢哋嘅支持。另一方面，Mab日後出書同埋推出本地農場合作產品，推廣自己健康自煮快樂嘅信念，吸引更多顧客。學海無涯，Mab會繼續進修廚藝，為學生同顧客帶嚟唔同嘅烹飪課程。

 

喺 香港創業 確實係有一定難度，但只要願意嘗試，就總有機會成功！唔知 Don 同 Mab 嘅 創業故事 啟唔啟發到你？

 

五木舍

Facebook: https://www.facebook.com/morinoyastudio/

Instagram: https://www.instagram.com/morinoyastudio/