平時去小食店緊係鍾意食雞蛋仔、煎釀三寶、魚蛋、燒賣呢啲小食，咪以為街頭小食本小利大一定賺，唔識做隨時得個桔。今次就一連兩集介紹街頭小食創業，仲請來從事飲食界40多年、仁愛堂YES專業進修課程「街頭小食創業證書課程」導師麥志城教路，想創業就咪錯過。

第一集先講講煎釀三寶。好多人以為煎釀三寶只係釀下魚肉，易整，必賺，但其實係咪真既呢？小編親身落場體驗，發現其實一啲都唔易。難度五粒星的話，都要畀四粒星。

煎釀三寶易蝕錢

因為要魚肉黏得實青椒或矮瓜，都要花相當的功夫，煎時又要夾岩火喉兼時間，否則一個唔該就綑黑邊，賣相嚇走顧客就要報銷。

麥志城亦表示，煎釀三寶是小食店最易蝕錢的其中一種食物，一來成本高，青椒和魚肉的價格較貴，二來青椒和魚肉容易變壞，整多了不能留過夜，要當垃圾掉走。除了煎釀三寶外，豆腐、及有魚肉的食物都容易變壞。

小店只宜集中一兩種小食

麥志城又指，如果選擇細舖位開舖，應集中一、兩樣食物，特別是高毛利的小食，所以盡量不要選像煎釀三寶這種易蝕的小食；而選擇大舖位的，則應提供多元化食物，以不同款式的小食來吸引更多人在舖外逗留，從而增加營業額。

不計店租，開小食店成本又會是多少呢? 麥志城表示，若是選擇細舖位開舖如60至100呎，連裝修器具，預計要用40萬元；若是選擇大舖位開舖如舖位大過200呎則要70萬元左右。

今集講完邊種小食最易蝕，下集我地就講邊樣食物最易賺錢，咪錯過呀。