香港寸金呎土，公屋輪候時間極長，上得到樓的一群自然開心得拍手，但同時要接受不能養狗的規條，被迫跟毛孩無緣也無份。九十後的楊紹廷(Roy)與張永燊(Vincent)正是這樣的一群 :「我本身住公屋，而Vincent屋企有老人家對狗敏感，所以我哋兩個完全喺無養貓狗嘅經驗。」

身為寵物界門口漢的二人，卻於三年前誤打誤撞成立了「PetBB」，由在網上賣貓狗用品到現在跟八名美容師及超過二十個寄宿家庭合作，逐步建立寵物王國。「年資同經驗當然重要，但非最重要一環，最緊要喺我哋有冇心。」

此盤生意目前不單月賺五萬，更為二人跟貓狗重新牽上紅線，過著「比狗圍」的生活。

初次與二人見面，只見Roy拉著載滿美容用具的沈重皮箱從地鐵站急步走來，對同行的美容師照顧有加。「我哋同美容師喺合作模式，老實講無佢哋都唔成事。」是日上門為玩具貴婦狗 － 奶茶沖涼剪毛，Vincent表示通常只在接待新客時才會跟隨上門，望對新服務的狗隻有多點了解。

剪毛收費按寵物品種及大小而定，大狗約三百八十至四百三十元，細狗則是二百二十至三百元。除了基本護理如剪甲、清淚腺、肛門腺和拔耳毛外，還設全剷、半手及全手剪，後者剪法則有造型之分。

「就如史納沙為例，會有飛馬裝、耳機裝，貴婦狗就會有熊啤裝。」但Vincent指主人非每次也能如願。「都要先了解狗仔本身嘅毛質喺點，就如太貼服嘅毛髮就剪唔到爆炸頭。」

剪毛期間奶茶不時四處走動，活像一名坐不定的頑皮小孩，只見美容師羊咩不時以溫柔聲線安撫著牠，更細心地解開奶茶重重打結的毛髮，不久後成功令牠乖乖坐好。「試過去出面鋪頭剪，佢哋會將門關上，隻狗叫到癲咗都唔理。」

奶茶主人Mandy指上門剪毛令她放心得多，而只有廿四歲的羊咩同樣表示找PetBB合作能讓她放下心頭大石。

「自己鍾意對狗多過對人，有佢哋幫手安排及調停同客人嘅誤會，自己可以專心一致地剪毛。」PetBB目前與八名美容師合作，全部不過三十歲。「自己都係後生就會知，好多嘢唔係單睇年紀。」

聽著羊咩清脆的剪刀聲、看著奶茶享受其中的表情，就知道他們沒有看錯人。

「以前有客人問我哋咁後生做得兩三年，交隻狗比我哋會唔會好大件事?」香港地愛貓狗之人何奇多，說是寵物其實更像親生骨肉。年紀輕加上是門外漢，在開店初期確實難以說服一眾毛孩父母，服務唯有更人性化，切合主人所需。

「我哋之前搵個間寵物酒店基本上喺唔會話比我哋知佢哋已放狗及已餵食，又喺無監錄攝影，講真一定會擔心。」金成與太太跟愛犬拉布拉多啫哩一同生活，數月前因家中裝修而需為啫哩暫覓住所，結果找上了PetBB作長達四個月的寄宿服務。

主人要在狗隻入住前先填好有關寵物習慣的問題，以了解其習性及健康。「狗酒店喺有探訪時間，變相我哋放工想去睇佢都好難，但Vincent佢哋其實廿四小時去都得，又唔洗困籠，三餐同放狗都會whatsapp相同影片比我哋。」

寄宿服務完結，但PetBB跟啫哩的緣份才剛開始；目前主人金成仍有使用每小時一百八十元的放狗服務。「始終拉布拉多出左名多精力，要每日放電。」訪問當天只見「跳跳紮」的啫哩樂於跟在Vincent左右，毫無生疏之感。

希望投宿的毛孩日益增多，自然需要找來更多寵物家庭。PetBB目前跟超過二十個家庭合作，並規定每個寄宿單位最多養三隻寵物及在入住前預約一次見面，以保障雙方。「我哋本身都好鍾意養狗，比狗仔黎寄宿就好似識多個朋友咁。」

本身家中有兩隻貴婦狗的Marco最長試過有狗仔來寄宿十天。Roy指寄宿服務同樣是按狗隻品種而定，再按日數收費，跟寵物家庭六四分帳。「目前利潤最多嘅都係寄宿，每月平均有三十單。」

「當初單喺IG賣寵物用品喺蝕錢，但唔想認輸就試咗寵物美容，反應幾好就慢慢去加服務，結果行到今時今日。」PetBB最近新加了免麻醉洗牙服務，同樣大受歡迎，更計劃把辦公室搬到村屋去，除了能增加寵物寄宿的地方，最重要是二人終於可光明正大地養狗了。